Аялал

Амьдралаа гайхамшигтайгаар өөрчлөх аяллын 7 санаа

Өөр улс руу аялах нь зөвхөн дэлхий ертөнцийг төдийгүй өөрийгөө танин мэдэх шилдэг арга юм. Бидний нүдийг нээж, сэтгэл зүрх ба оюун санааг чөлөөлөх аяллын долоон санааг танилцуулж байна.

Карибын арлууд дээр цаг уур судлах сайн дурын ажил

Нэгдүгээр сард Карибын арлууд дээр цаг агаар халуун, чийглэг байдаг бөгөөд далайн ус маргад эрдэнийн өнгөтэй болж хувирдаг. Энд зах дээр хүний гарын хэмжээтэй амьд хавчыг худалдаалж, далайн эрэг дагуу ягаан өнгөтэй хясаанууд хөглөрч, харин боомтуудад Америкчуудаар дүүрсэн хөлөг онгоцнууд зогсоно. Орой гэхэд жуулчид хөлөг онгоцтойгоо далайд гарснаар жинхэнэ Карибын амьдрал эхэлдэг.

Сайн дурын ажилд хамрагдсанаар амьдралынхаа багахан хэсгийг жинхэнэ арлын иргэн шиг өнгөрүүлэх боломжтой юм. Хүсвэл та нэг сар эсвэл бүр хагас жилийн хугацаанд ч амьдарсан болно. Энд та завиар аялж, усан дээр амьдарч, ажиллаж, нутгийн иргэдтэй танилцаж мөн сүрэг хотон шувуунуудаар өөрийгөө хүрээлүүлнэ. Мөн наранд биеэ шарж, жин хасаж, Карибын ч тэр, Монголын ч тэр цаг уурын талаар маш олон зүйлсийг ойлгох болно.

Невада мужид зохиогддог Burning Man наадамд оролцох

Тийм ээ, энэ наадамд оролцоход маш үнэтэй. Гэхдээ та энэ их мөнгийг төлсөндөө огтхон ч харамсахгүй. Гайхалтай мэдээ дуулгахад та өөрийн гэсэн урлагийн бүтээл урлаж, наадамд оролцох тэтгэлэг авах боломжтой. Burning Man наадмын зохион байгуулагчид Өөрсдийгөө илэрхийлэх радикал нийгэмлэг бүтээх туршилт хэмээн тус арга хэмжээг тодорхойлсон байдаг. Тиймээс Burning Man наадамд оролцох нь эхийн сүүтэй хамт таны толгойд сууж өгсөн ёс суртахууныг тань ганхуулах болно.

Гэгээн Жеймсийн замаар бадарчлах

Испанийн Сантьяго-да-Компостела хотын сүмд Гэгээн Жеймсийн аугаа хүч чадал хадгалагддаг хэмээн домогт өгүүлдэг. Харин энэхүү бадарчлалын зам нь зөвхөн нэг зам бус харин Франц, Португалиас эхлээд Пиренейн уулсаар дамжин өнгөрөх маш олон жимээс бүрдэж байгаа юм. Үүнээс хамгийн алдартай маршрут нь Сантьяго-да-Компостелагаас 780 км зайд орших Сен-Жан-Пье-де-Пор гэх Францын тосгоноос эхэлдэг. Бадарчлах нь өөрийгөө ганцаардал, биеийн хүчний ажил, интернетгүй орчноор сорихын зэрэгцээ үдэш бүр тантай ижил замаар явж буй хүмүүстэй учирч, тэднээс чин сэтгэлийн дэмжлэг авах боломжийг олгоно.

Кени улсын хүүхдүүдэд туслах сайн дурын ажил

Кени бол Зүүн Африкийн хамгийн сонирхолтой бөгөөд асар хурдацтай хөгжиж буй орнуудын нэг юм. Гэсэн хэдий ч ихэнх Кеничүүд соёл иргэншлийн давуу талыг хүртэж чадаагүй л байна. Энэхүү сайн дурын ажилд хамрагдсан хүмүүсийг Найроби дүүрэгт байрлах сайн үйлсийн төвүүдэд хүлээж авах болно.

Сайн дурын ажилтан болоход ямар нэг тусгай чадвар шаардлагагүй ч халуун цаг агаарт тэсвэртэй байж, хангалттай эрч хүчтэй байх ёстой юм. Мөн мэдээж хэрэг хүүхдүүдэд хайртай байх хэрэгтэй. Сайн дурын ажилтнууд хүүхдүүдэд анхаарал тавихаас гадна, бяцхан Кеничүүдэд дуу хөгжмийн суурийг зааж, охидод боловсрол олгож эсвэл хөгжлийн бэрхшээлтэй иргэдийг халамжлах үүрэг хүлээнэ.

Атлантын далайн эсвэл heavy metal аялал

Хэдийгээр тэтгэврийн насны хүмүүст зориулагдсан мэт санагдаж магадгүй ч далайн аялал нь дэлхийг танин мэдэх сайхан арга юм. Тэр тусмаа хоёр долоо хоног үргэлжлэх Атлантын далайг гатлах аялал нь Газар дундын тэнгисийн долоо хоногийн аяллаас харьцангуй хямд үнэтэй байдаг. Далайн аялал бол дижитал детокс хийж (хөлөг онгоц дээр интернет маш удаан бас үнэтэй байдаг), далайн гахайнуудтай тааралдаж, цонхны цаанаас үзэгдэх хязгааргүй далай ба тэнгэрийг харах гайхалтай боломж юм.

Мөн аяллын үеэр Мадейра, Азора ба Канарын арлууд эсвэл Бермудад зогсох болно. Долоо хоногийн дотор бараг дэлхийн талыг туулна гэхээр гайхалтай биш гэж үү?

Хэрэв Атлантын далайн аялал танд хэт удаан санагдаж байвал Герман ба Английн хооронд зорчих heavy metal хөгжмийн аялалд гарч болох юм. Энэхүү аяллын гол зорчигчид нь биеэрээ дүүрэн шивээстэй, Metallica хамтлагийн аялан тоглолтын футболка өмссөн эрчүүдээс бүрдэнэ. Хэрэв та ч гэсэн металл хөгжмийн шүтэн бишрэгч бол дэлхийн өнцөг бүрээс ирсэн санаа нэгтнүүдтэйгээ нэг дор танилцах боломжтой.

Аризонагийн жимээр морин аялал хийх

Мэдээж хэрэг морьтой аяллыг эх орондоо ч хийж болно. Харин Аризонагийн аялал нь өөрийн гэсэн онцлог байгалийн тогтцоос гадна жилийн дөрвөн улиралд аялагчдыг хүлээж авдаг гэдгээрээ онцлог юм. Уг аялал нь өмнө зүгээс эхлээд хойд зүг хүрэх бөгөөд энэ хооронд АНУ-ын хамгийн алдартай жуулчдын маршрутаар (Гранд Каньон ч багтана) дайрах болно.

Энэхүү замыг явган туулахад сар хагасаас хоёр сар хагасын хугацаа шаардагддаг. Аяллын турш өөрийгөө ойлгоод зогсохгүй, ковбойчуудын тухай, Вестерн соёлын талаар маш олон зүйлийг ухаарах болно. Уг аялалд гарахад та өөрөө визээ авах шаардлагатай гэдгийг санаарай. Хэрэв та Аризонагийн аяллын тухай илүү ихийг мэдэхийг хүсвэл Netflix-ийн Unbranded нэртэй баримтат киног үзэхийг бид зөвлөж байна.

Бясалгалын аргаар харилцааны детокс хийх

Та хамгийн сүүлд хэзээ хаашаа ч яаралгүй шалан дээр эгц сууж ээжийнхээ тухай бодсон бэ? Бодит үнэнийг олж харахад тусалдаг Випассана (Випашяна) нь Буддын шашны бясалгалын сонгодог дөрвөн төрлийн нэг юм. Бясалгалын курс эхлэхээс өмнө оролцогчид бүх электрон төхөөрөмжүүдээ хураалгаж, нийт 10 хоногийн турш юм ярихгүй нам гүн байх ёстой.

Випашянаг бие болоод сэтгэлийн дасгал гэж ойлгож болно. Энд 10 хоногийн турш бусад хүмүүстэй харьцахгүй байж, тогтмол цагт босож, амарч, мөн хоолны маш чанга дэглэм баримтлах шаардлагатай. Энэхүү бясалгал нь орчин үеийн хүмүүсийг өөрөө өөртэй нь танилцуулж, сэтгэлийн гүнд орших бүх асуултын хариултыг өгөх юм. Мөн энэхүү бясалгал нь үнэ төлбөргүй явагддаг байгаа.

Санал болгох нийтлэл

Сэтгэгдэл

АНХААРУУЛГА: Уншигчдын бичсэн сэтгэгдэлд Winnergy.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Back to top button
error: Content is protected !!